وايون
پنڌُ پرانھين پار جو،
گهوڙا ٻڌ نہ گهاٽ تي.
رنگ لھوءَ جي راند ۾،
ريٽو ڪر ڪٽار جو،
گهوڙا ٻڌ نہ گهاٽ تي.
سورهيہ سڪي سوڀ کي،
ڪانئر سڻڪو ھار جو،
گهوڙا ٻڌ نہ گهاٽ تي.
ڪنڊيءَ لنوين ڪانگڙو،
ڪو ماڻھو آ ولھار جو،
گهوڙا ٻڌ نہ گهاٽ تي.
(2)
جنگ کٽي جونجهار،
ڀلي ڪري آيا،
جي ڪري آيا.
ڇاتي ڇيتيون، وار رتاوان،
سورهيہ جو سينگار،
ڀلي ڪري آيا،
جي ڪري آيا.
وار ڇنڊيندي، ماءُ ٻُڌي ٿم،
گهوڙن جي هڻڪار،
ڀلي ڪري آيا،
جي ڪري آيا.
وکَّ کنيائُون، وَيرُ وتائُون،
ڌَڙَ ڪيائون ڌار،
ڀلي ڪري آيا،
جي ڪري آيا.
ٻُنگُ، کٿوري، ٻور وڻن ۾،
هير ۾ آ هٻڪار،
ڀلي ڪري آيا،
جي ڪري آيا.