سنڌڙيءَ وارو شاھ ڀٽائي
سنڌڙيءَ وارو شاهه ڀٽائي، جَڳَ سان اڄ ڳالهائي ٿو،
ٻڌو ٻڌو اي دنيا وارو، ڳالهه وڏي ورجائي ٿو.
وحدت ڪثرت منجهه سمائي،
آهي ذات صفات هِڪائي،
سڀ ۾ ساڳيو نُور اِلاهي
ڳالهه اِها سمجهائي ٿو.
ڪير، ڪٿان جا، ڪهڙا آهن،
خالق خلقيا اهڙا آهن،
ماڻهو سڀ هڪجهڙا آهن،
ڳالهه اِها سمجهائي ٿو.
جيڪو جنگ جي باهه لڳائي،
ڌرتيءَ تي بارود وَسائي،
ڪجهه به هجي، انسان نه آهي،
ڳالهه اِها سمجهائي ٿو.
جيسين مَن ۾ آهه ٻِيائي،
درد جي دعوا آهه اجائي،
پيارَ بنا ٻي ناهي سچائي،
ڳالهه اِها سمجهائي ٿو.....