(96) جميل سومرو
[شاعر]
اصل نالو: جميل احمد
ادبي نالو: جميل سومرو
ولد : محمد ابراھيم
ذات : سومرو
جنم : 05 جنوري 1969ع تعليم: ايم.اي ( اڪنامڪس)، ايم.ايڊ
ڪرت : ھاءِ اسڪول ٽيچر. رابطو: 03337242432
رهائش : تعلقو ڏھرڪي، ضلعو گھوٽڪي، سنڌ.
لکڻ جي شروعات : بي ضابطہ 1992ع کان ( جملي 2 کان 44 غزل ۽ پوءِ ڊگھي ماٺار)، باضابطہ شروعات 2013 کان.
ڇپيل مواد : مھراڻ ، ڪاوش، ناٽڪ، پوپٽ وغيره.
لکيل صنفون : بيت، وائي، ڪافي، غزل، ٽيڙو، ترائيل، سانيٽ، نظم، دُھري، چوسٽا، ھائيڪا، نثري نظم ۽ مضمون وغيرہ
ڇپيل ڪتاب: "ريشم جھڙا خواب"
سندس شاعريءَ مان ڪجھه چونڊ
[b]غـــــــزل[/b]
سنگيت ۽ سُر تار تي پهرا نه لڳايو
فطرت سان کُليل پيار تي پهرا نه لڳايو
هر شوخ ڪلي واءُ ۾ آزاد ڇڏي ڏيو
احساس تي اظهار تي پهرا نه لڳايو
نيڻن ۾ رکي خواب سنهرا جو وڌي پيو
مسڪين جي هن ٻار تي پهرا نه لڳايو
پئِي امن محبت سڄي دنيا ۾ پکيڙي
صوفيءَ جي سوچ سار تي پهرا نه لڳايو
ماڻهن جا مئل روح ڪلا ساڻ جياري
راڳيءَ تي ، ڪلاڪار تي پهرا نه لڳايو
هي شاهه، سچل پيار جي پيغام جا داعي
ڪنهن بيت جي جهونگار تي پهرا نه لڳايو
[b]وائــــــي[/b]
نديءَ گهَري ننڊ ۾
سانجهي سج لٿي..!!
پير نه ڪو پاڇو
گهٽي گهَري ننڊ ۾
سانجهي سج لٿي..!!
اڀ تي چنڊ رڳو
پکي گهَري ننڊ ۾
سانجهي سج لٿي..!!
ساري ڏينهن جو ٿڪ
ونيءَ گهَري ننڊ ۾
سانجهي سج لٿي..!!
ٻوڙ نه ڪا مانيءَ
وَٽي گهَري ننڊ ۾
سانجهي سج لٿي..!!
پورو ڳوٺ سُتل
ٻنيءَ گهَري ننڊ ۾
سانجهي سج لٿي..!!
بابا ڪونه وريو
ڪِڪِي گهَري ننڊ ۾
سانجهي سج لٿي..!!
[b]پنجڪـــــڙو[/b]
ڪپهه ڄڻ ڪانڀ ۾ آهي
پشم جهڙو بدن هنج ۾
آ نيرولو گگن هنج ۾
سکي اڄ سانڀ ۾ آهي
ڪپهه ڄڻ ڪانڀ ۾ آهي