لوڪ ادب، لساني ۽ ادبي تحقيق

موزون آکاڻين ذريعي جڙيل پهاڪا ۽ چوڻيون

ڪتاب ”موزون آکاڻين ذريعي جڙيل پهاڪا ۽ چوڻيون“ اوهان اڳيان پيش ڪجي ٿو. هي پهاڪن ۽ چوڻين جي ڪتاب جو سهيڙيندڙ عبد الوهاب سهتو آهي.
Title Cover of book موزون آکاڻين ذريعي جڙيل پهاڪا ۽ چوڻيون

73. چور به جهڙو ڪاڪو (ساهتي، پهاڪو)

هڪڙي هندوءَ جي گهر مان چوري ٿي وئي. اتفاق سان سندس ننڍڙي ڇوڪري ان وقت جاڳي پئي ۽ چور کي ڏسي ورتائين. صبح جو گهر ڀاتي سجاڳ ٿيا ته ننڍڙيءَ کي بستري تي روئيندو ڏٺائون. ڇوڪري ڊنل هئي، تنهن ڪري کيس آٿت ڏنائون ته جيئن چور جي حليي بابت ٻڌائي سگهي.
شام تائين ننڍڙي سرت ۾ آئي ته کانئس چور جي حليي بابت پڇيائون؛ ”چور ڪيئن هئو؟!“
”چور به جهڙو ڪاڪو!“ ڇوڪريءَ ورندي ڏني.
مطلب: ۱- چورن کي مٿي تي سڱ ڪين ٿيندا آهن. ماڻهو ماڻهن جهڙا هوندا آهن.
۲- عهدو يا طاقت ملڻ سان ماڻهوءَ کي سڱ نه لڳي ويندا آهن.