هن دور ۾ سچي ڪٿ محبت نه ٿي ملي،
نفرت ملي مگر ٿي الفت نه ٿي ملي.
احساس ناهي ڪنهن ۾ ماڻهو صفا ٿيا سنگدل،
جاچي ڏٺو مون جڳ کي قربت نه ٿي ملي.
اخلاق ۽ حياءُ ڪونهي شرم ڪو ڪنهن ۾،
صورت ملي ٿي ليڪن سيرت نه ٿي ملي.
هر ڪوئي آ پريشان، ناهي سڪون ڪنهن کي،
ڪنهن روح کي ڪٿي ڀي راحت نه ٿي ملي.
اخبار جا پڙهون ٿا ڪُل موت جون ئي خبرون،
ڪانهي خبر خوشي جي فرحت نه ٿي ملي.
هر چيز ۾ ملاوٽ ٿي عام جام وئي آ،
خالص سچي ۽ صاف مُروت نه ٿي ملي.
پئسن سواءِ ڪنهن جو ڪوئي نه ڪم ٿئي ٿو،
جيسين ڪا ڪنهن کي ٿوري رشوت نه ٿي ملي.
لوچي نه ٿو ڪو جيسين تيسين ‘سميع ساجد’،
ويٺي ڪا ڪنهن کي گهر ۾، دولت نه ٿي ملي.
**