منڌرن جو دڙو
ميرپورخاص جي تعلقي ڊگهڙي جي يونين ڪائونسل مير فتح خان ٽالپر ۾ قديم ندي پراڻ جي اولهه طرف ڳوٺ راڻو رمداڻ ويجهو هڪ وڏي ايراضي ۾ هي آثار پکڙيل آهن. هنن آثارن جي اوچائي چاليهه فوٽ آهي. جنهن مان اهو ظاهر ٿئي ٿو، ته هنن آثارن ۾ ڪو وڏين عمارتن وارو شهر دفن ٿيل آهي. هن دڙي جي ٺڪراٺ ۽ ٿانون جي نفاست هڪ سڌريل سماج جي شاهدي ڏين ٿا . جيڪڏهن کوٽائي ڪري هن دڙي جا دفن ٿيل راز ظاهر ڪيا ويا، ته هن شهر بابت سموري معلومات ظاهر ٿيندي. هتي سارين ڏرڻ جي جنڊين جا ٽڪرا وڏي تعداد ۾ پکڙيل آهن . جنهن مان اهو به گمان ٿئي ٿو ته هتي آسپاس پاڻي جي گهڻائي سبب زرعي خوشحالي هئي. مقامي ماڻهن جي چوڻ موجب هن شهر جي آسپاس سرنهن جا فصل به ٿيندا هئا. هتي جو تيل مشهور هو. هي قديم ماڳ به سنڌو تهذيب ۾ شمار ڪري سگهجي ٿو، پر هي سرسوتي تهذيب جي سرحد جي ويجهو هو.