شاعري

پارسائي جون حدون

”پارسائي جون حدون“ نئين ٽهيءَ جي خوبصورت شاعر امداد سولنگيءَ جي شاعريءَ جو مجموعو آهي. امداد سولنگيءَ جي هِن پهرين شعري مجموعي “پارسائي جون حدون” ۾ انساني صحيفن جي لتاڙ خلاف آواز سميت اکين جو رستو چيري دل ۾ گھر ڪري ويندڙ محبتي مايا جو سمنڊ موجود آهي، جنهن ۾ پيار ۽ پريت جون لهرون عشاق دلين جي قافلن کي ٿڪاوٽ جي صورت ۾ گھاٽي ڇانوري جو احساس ڏيارين ٿيون.
Title Cover of book پارسائي جون حدون

لڳي جي لوڙ آهي زندگي ۾،

لڳي جي لوڙ آهي زندگي ۾،
اڃان غم کوڙ آهي زندگي ۾.

هِتي هرڪو ٿو پنهنجا خواب ڳولي،
عجب هي ڊوڙ آهي زندگي ۾.

شهر جي چوئنڪ تي بيٺو مان سوچان،
وڏو ڪو گوڙ آهي زندگي ۾.

بچايو آ خدا بي سمجھ ناهيان،
علم جي اوڙ آهي زندگي ۾.

ملڻ جي آرزو هُن پاڻ ڪئي آ،
مٽيو هُن موڙ آهي زندگي ۾.

رکي سڀ ساڻ مون اڄ ڀي اُها ئي،
مٺا هٿ جوڙ آهي زندگي ۾.

مٿي ۾ موت جي لڳڻي هي آخر،
وڏي ڪا ڦوڙ آهي زندگي ۾.