شاعري

پارسائي جون حدون

”پارسائي جون حدون“ نئين ٽهيءَ جي خوبصورت شاعر امداد سولنگيءَ جي شاعريءَ جو مجموعو آهي. امداد سولنگيءَ جي هِن پهرين شعري مجموعي “پارسائي جون حدون” ۾ انساني صحيفن جي لتاڙ خلاف آواز سميت اکين جو رستو چيري دل ۾ گھر ڪري ويندڙ محبتي مايا جو سمنڊ موجود آهي، جنهن ۾ پيار ۽ پريت جون لهرون عشاق دلين جي قافلن کي ٿڪاوٽ جي صورت ۾ گھاٽي ڇانوري جو احساس ڏيارين ٿيون.
Title Cover of book پارسائي جون حدون

جا نه جيئان تو ڪاڻ حياتي،

جا نه جيئان تو ڪاڻ حياتي،
ڪهڙي ڪم جي هاڻ حياتي.

چارن ۾ چانڊوڪيءَ ڀاسي،
ڇِرڪي پئي ڇا ڪاڻ حياتي.

اچبو توڏي هر هر سائنڻ!
جيسين هوندي ،ساڻ حياتي.

لمحو لمحو پئي ٿي گذري،
سور غريبن ڪاڻ حياتي.

هارياڻي جي تن جو چولو،
ڦاٽل ڪو ،پهراڻ حياتي.

يار وٽيندي گذري وئي آ،
يادن جا هي واڻ حياتي.

اچ ته ڪناري ويهي ماڻيون،
موج سندي ،مهراڻ حياتي.