شاعري

پارسائي جون حدون

”پارسائي جون حدون“ نئين ٽهيءَ جي خوبصورت شاعر امداد سولنگيءَ جي شاعريءَ جو مجموعو آهي. امداد سولنگيءَ جي هِن پهرين شعري مجموعي “پارسائي جون حدون” ۾ انساني صحيفن جي لتاڙ خلاف آواز سميت اکين جو رستو چيري دل ۾ گھر ڪري ويندڙ محبتي مايا جو سمنڊ موجود آهي، جنهن ۾ پيار ۽ پريت جون لهرون عشاق دلين جي قافلن کي ٿڪاوٽ جي صورت ۾ گھاٽي ڇانوري جو احساس ڏيارين ٿيون.
Title Cover of book پارسائي جون حدون

وقت وڃائي نڪري ويو آ،

وقت وڃائي نڪري ويو آ،
جيون ،گهائي نڪري ويو آ.

پاڻ رهياسين سچ تي پر ڪو،
ڪوڙ ،ڪمائي نڪري ويو آ.

چنڊ حياءُ جا بادل اوڍي،
ڪيئن شرمائي نڪري ويو آ.

شام ڏَسي ٿي اڄ هو ٻاهر،
سُرمو پائي نڪري ويو آ.

عشق اکين کي بُوسا ڏيندي،
ننڊ ،اُڏائي نڪري ويو آ.

دردن جي دنيا مان امداد،
پير پچائي نڪري ويو آ.