چند لمحن جي چاهت کڻي ٿا اچو،
يار ڪيڏي هي راحت کڻي ٿا اچو.
جي اچو ٿا اسان لاءِ جيئڻ جو نئون،
آسرو ۽ ڪا آٿت کڻي ٿا اچو.
تنگ پوپٽ پيا ڪن اوهان کي تڏهن،
روز تَن جي شڪايت کڻي ٿا اچو.
نيٺ ڪهڙي يزيدي زماني منجھان،
قرب ٻوڙي قباحت کڻي ٿا اچو.
ٽهڪ ڇيڙي هوا ۾ سُريلا سندا،
موسمن جي بشارت کڻي ٿا اچو.
نيڻ ناسين ۾ جانان ٺهي ڪانه ٿي،
هي جا مون لئه حقارت کڻي ٿا اچو.
پو فرشتا پُڇن ٿا هي رُتبو ڏسي،
جڳ مان ڪهڙي عبادت کڻي ٿا اچو.