شاعري

پارسائي جون حدون

”پارسائي جون حدون“ نئين ٽهيءَ جي خوبصورت شاعر امداد سولنگيءَ جي شاعريءَ جو مجموعو آهي. امداد سولنگيءَ جي هِن پهرين شعري مجموعي “پارسائي جون حدون” ۾ انساني صحيفن جي لتاڙ خلاف آواز سميت اکين جو رستو چيري دل ۾ گھر ڪري ويندڙ محبتي مايا جو سمنڊ موجود آهي، جنهن ۾ پيار ۽ پريت جون لهرون عشاق دلين جي قافلن کي ٿڪاوٽ جي صورت ۾ گھاٽي ڇانوري جو احساس ڏيارين ٿيون.
Title Cover of book پارسائي جون حدون

تيز رهندو تار رهندو،

تيز رهندو تار رهندو،
وقت بي ميار رهندو.

لڙڪ وهندا ڪونه جيسين،
دل اکين تي ،بار رهندو.

چنڊ آڏو رات ، ساري،
بادلن جو ڄار رهندو.

تُو هٿن جو لمس اَرپيو،
گل هميشه ، هار رهندو.

مئڪدا آباد رهندا،
خاص ڪو ، خُمار رهندو.

ڳوٺ جانان لئه اسان جو،
من سراپا ، سار رهندو.

مطلبي هِن لوڪ ۾ اڄ،
ڪير ڪنهن جو ، يار رهندو.

سوچ کي امداد ماري،
ڪيئن لکڻ کان ،ڌار رهندو.