شاعري

پارسائي جون حدون

”پارسائي جون حدون“ نئين ٽهيءَ جي خوبصورت شاعر امداد سولنگيءَ جي شاعريءَ جو مجموعو آهي. امداد سولنگيءَ جي هِن پهرين شعري مجموعي “پارسائي جون حدون” ۾ انساني صحيفن جي لتاڙ خلاف آواز سميت اکين جو رستو چيري دل ۾ گھر ڪري ويندڙ محبتي مايا جو سمنڊ موجود آهي، جنهن ۾ پيار ۽ پريت جون لهرون عشاق دلين جي قافلن کي ٿڪاوٽ جي صورت ۾ گھاٽي ڇانوري جو احساس ڏيارين ٿيون.
Title Cover of book پارسائي جون حدون

پنڌ اُگھاڙا پير وفا جي رستي ۾،

پنڌ اُگھاڙا پير وفا جي رستي ۾،
اُلڪا اڌما ڍير وفا جي رستي ۾.

عرصي کان پئي پالي ويٺي دل پنهنجي،
ماڻهن جا هي ،وير وفا جي رستي ۾.

پنهنجي آ هٿ جوڙ پرين! هِت هر ڪنهن سان،
ڪهڙا پنهنجا ،غير وفا جي رستي ۾.

من جا هِن مجذوب ارادا منزل ڏي،
ڇمڪي پئي ٿي ،ڇير وفا جي رستي ۾.

نيڻن جا ڪشڪول ٽمي ٿيا خالي ها،
دلبر تو ڪئي دير وفا جي رستي ۾.

چاهت جي گھنگھور گھٽا ڪو آڇيندو،
توبن هاڻي ،ڪير وفا جي رستي ۾.