شاعري

پارسائي جون حدون

”پارسائي جون حدون“ نئين ٽهيءَ جي خوبصورت شاعر امداد سولنگيءَ جي شاعريءَ جو مجموعو آهي. امداد سولنگيءَ جي هِن پهرين شعري مجموعي “پارسائي جون حدون” ۾ انساني صحيفن جي لتاڙ خلاف آواز سميت اکين جو رستو چيري دل ۾ گھر ڪري ويندڙ محبتي مايا جو سمنڊ موجود آهي، جنهن ۾ پيار ۽ پريت جون لهرون عشاق دلين جي قافلن کي ٿڪاوٽ جي صورت ۾ گھاٽي ڇانوري جو احساس ڏيارين ٿيون.
Title Cover of book پارسائي جون حدون

درد جو درمان جيڪر ٿي پوي،

درد جو درمان جيڪر ٿي پوي،
تو هٿان احسان جيڪر ٿي پوَي.

مان سجايان گھر گِھٽي هر چوڪ کي،
مُحب هو مهمان جيڪر ٿي پوَي.

لوڀ ، لالچ ،ڌن دنيا دولت مٿان،
ماڻپهي جو مان جيڪر ٿي پوَي.

شهر کان موڙي رکان ٿو مَن وڃي،
ڳوٺ پنهنجو ڌيان جيڪر ٿي پوَي.

خواب لاءِ جھاڳيل اکين جو پنڌ هي،
ساڀيان سامان جيڪر ٿي پوَي.

هِن خزان جي هُوڏ سامهون عاشقي،
گل ڀَريل گلدان جيڪر ٿي پوَي.