شاعري

پارسائي جون حدون

”پارسائي جون حدون“ نئين ٽهيءَ جي خوبصورت شاعر امداد سولنگيءَ جي شاعريءَ جو مجموعو آهي. امداد سولنگيءَ جي هِن پهرين شعري مجموعي “پارسائي جون حدون” ۾ انساني صحيفن جي لتاڙ خلاف آواز سميت اکين جو رستو چيري دل ۾ گھر ڪري ويندڙ محبتي مايا جو سمنڊ موجود آهي، جنهن ۾ پيار ۽ پريت جون لهرون عشاق دلين جي قافلن کي ٿڪاوٽ جي صورت ۾ گھاٽي ڇانوري جو احساس ڏيارين ٿيون.
Title Cover of book پارسائي جون حدون

نينهن نويلو چانڊوڪي سان،

نينهن نويلو چانڊوڪي سان،
من جو ميلو چانڊوڪي سان.

منظر مَن ۾ لهندڙ آهي،
چَمڪيو ٻيلو چانڊوڪي سان.

ڀُرندو آهي روز ازل کان،
غم هي ڀيلو چانڊوڪي سان.

اُڻت اندر ۾ احساسن جي،
سوچ سويلو چانڊوڪي سان.

اُورڻ ويٺي آهي سَرتي!
ڏاج ڏَهيلو چانڊوڪي سان.

گڏجي گھاريون آءُ ڪڏهن تون،
رات اَويلو چانڊوڪي سان.

چنڊ اگھاڙو پَڌرو آهي،
سمنڊ اڪيلو چانڊوڪي سان.