رمز انهيءَ ۾ خود کي ڪاهيون آءُ وَري،
چاهت جو ڪو رشتو ٺاهيون آءُ وري.
ننڍپڻ يادون ميڙي نِم جي ڇانوُن ۾،
جھُور اکين جا ٿڪ ڪي لاهيون آءُ وري.
ماءُ سڏي ٿي پيار منجھان گھر موٽي آ،
جيجل ڀر ۾ خُلد ڪمايون آءُ وري.
مور مٺا تون وسريو ناهين مَڃ هاڻي،
دل ۾ تنهنجون اڄ ڀي جايون آءُ وري.
گل ٿو ڇاڻي ڪير هوا ۾ ٽهڪن جا،
ڪنهن جو آ محبوب ڪَنايون آءُ وري.
رسمن جي ديوارن پويان هوءَ باندي،
هر هر چَئي ٿي چاهه نڀايون آءُ وري.
جيون کلندو ملندين جيڪر محبوبا،
آس انهيءَ تي جيئرا آهيون آءُ وري.