هُرَلا هلندا نار،
ٻنين ۾،
هُرِلا هلندا نار!
جھر جھنگ ڪٽبا، ٻيجا ڇٽبا، هڪلي ويندي جھارِ،
ڪيچ ڪڻي مان ٿي ئي پوندا جنهن مان جُڙندي ٻارِ،
ڳانڌيءَ تان هو، ڳائيندا پيا، ٻيلھون ٺاهي ٻار،
ٻنين ۾،
هُرِلا هلندا نار!
آڀُونءَ نيسر پوک به ٿيندي، هوءَ به وهِيءَ جو پُورُ،
پورهئي مان به نه پانڌ ڇڏائي، چاهت ۾ ڀي چور،
سَنڌَ سَنڌَ منجھه سرائت ٿيندي، ساجن جي ڄڻ سار،
ٻنين ۾،
هُرِلا هلندا نار!
پکي پکڻ پيا لاتيون لنوندا چوڏس ڄڻ ڪي چنگ،
تازي آيل پاڻيءَ تي پيا ٽپندا ڪڏندا ڪنگ،
لھندڙ سج جي لام منجھان ڪا، وڄندي ڄڻ ته ستار،
ٻنين ۾،
هُرِلا هلندا نار!
ٻاڦ ٻنين جي ٻارن تي جو ڪڻڪن تي ٿيا پهريان پاڻي،
جن مان چونڊڻ جيتن ڪارڻ پُڄي پَکِي کٽياڻي،
جنهن جو ٻولڻ ساز وڄي ڄڻ،جڏهن ڪري تنوار،
ٻنين ۾،
هُرِلا هلندا نار!
مند به موٽي ماڳُ پُڳيِ آ، ساجن موٽي آءُ !
هيڏا سيءَ نه هيکل ڪٽبا، لڳي اتر جو واءُ،
پَرِوُسِ پريتم!، بي وس بنجي، ڏُٻرا ڪيان آچار،
ٻنين ۾، هُرِلا هلندا نار!