ڪنهين کي ستائڻ اسان کان نه ٿيندو.
اُچائڻ رنجائڻ اسان کان نه ٿيندو.
غريبن يتيمن کي اغوا ڪرائي،
ائين ڀُنگ کائڻ اسان کان نه ٿيندو.
پَڪو پختو واعدو ڪري ڀل ڦِري هُو،
وچن کي وسارڻ اسان کان نه ٿيندو.
نه چورن سان ياري، نه ٿاڻي تي اچ وَڃُ،
ٻَڌائڻ ڇڏائڻ اسان کان نه ٿيندو.
اسان کي ڏسي جيئن ڪيو تو هو پاسو،
ائين مَن! لنوائڻ اسان کان نه ٿيندو.
ٻُڌائڻ گهُرون ٿا فقط سُور توکي،
گهڻن کي ٻُڌائڻ اسان کان نه ٿيندو.
جُهڪڻ جو نه ڏي عيبُ ’زخميءَ‘ کي قاتل!
جَبين کي جُهڪائڻ اسان کان نه ٿيندو.