”وصيت“
پاپ نگر ۾
ارڏو ماڻهو
خون وِلوڙي،
نُور نچوڙي،
ڪن جُڳن کان ڪلڪُون ٻوڙي
لکندو آهي سُونهن ۽ سچ تي!
انسانيت جي آئيندي لئه،
دين ڌرم کي ليڪا ڏيئي،
ڪينجهر کان ڪارونجهر تائين
ٻج ڇٽي ٿو، محبت وارو!
ڌرتيءَ جي هن گولي تي جيئن
مارُو مُرڪي
سنڌ امڙ جي سينڌ سنوارن
اجرڪ ٽوپي پَٽڪا پائي
ڊيمون ڊاهي، سنڌ بچائن،
ها پر! پنهنجي نقشِ قدم تي
پنهنجا ٻچڙا تيار ڪري ٿو
پنهنجو مورچو تن کي ڏيئي
ڪن ۾ دل جون ڳالهيون تن سان
آزاديءَ ۽ موت جون ٻولي
چوندو آ او خالد، ساجد!
منهنجا پُٽ حلالي آهيو،
رکجو وصيت ياد سدائين
سنڌ سلامت رکڻي آهي
قوم سلامت رکڻي آهي.