”وڏا ڪُڪڙ“
نام نهاد
جهموريت جي دعويدار
لانگ بوٽي خاڪي وردي وارن جي
ماڻهپي جي سرحدن تي
عين انهيءَ وقت پهچي ويس
جڏهن
بجليءَ بل جي آڙ ۾
ڌرتي ڌڻين جي تذليل ڪندي
ڪِن کي ڪُڪڙ بنايو ويو
ته ڪن کي سِج ڏانهن
مُنهن ڪري بيهاريو ويو هو،
پر
انهن ۾
هڪ ننڍڙي معصوم ٻار کي
ڪُڪڙ ٿيل ڏسي
خون اکين ۾ لهي آيو،
هفتو اڳ ان ٻار جي ماءُ کي
ڪارنهن جي الزام ۾ قتل ڪري
سندس پيءُ
جيل وڃي چُڪو هو.
”نٿو مرڻ چاهيان“
جنهن
سڄي زندگي
حلال جو هڪ گرنهه به
نه کاڌو هجي
جنهن جو ذريعه معاش
صرف ۽ صرف
چوري، ٺڳي، داداگيري
بليڪ ميلنگ، بدمعاشي
يا
بندوق جي داٻي
۽
غيرت جي آڙ ۾ بيغيرتي واري
دقيانوسي رسم
ڪاروڪاري تي هجي،
جنهن کي مِٽ مائٽ، يار دوست
ڀائر ڀائيٽا ته ڇا پر
ڀاڄائي
۽
ڀائيٽيءَ جي به شناس نه هجي
آئون اهڙي منحوس ماڻهوءَ هٿان
نٿو مرڻ چاهيان.