مٽيءَ جا رانديڪا ميڙي،
اکڙين ۾ ڪو سپنا ميڙي.
سُکَ سڀن سان هر ڪو وِرڇي،
ڏُکَ ماڻهو ٿو تنها ميڙي.
بُکَ جو رنگُ ڏٺو ڪنهن آهي؟
فٽ پاٿن تان فاقا ميڙي.
هر ڪو پنهنجو جهول ڀَري ٿو،
گل ميڙي، ڪو ڪنڊا ميڙي!
شيش محل ۾ هڪڙو چهرو،
ڪيڏا پنهنجا چهرا ميڙي!
تنهنجي پير پڻيءَ تي رکبا،
پنهنجا سارا سجدا ميڙي.
رات ٻَڌي مون تنهنجي سڳيءَ سان،
عُمر سڄيءَ جي تقويٰ ميڙي!
شاعر ڪوتا مالها جوڙي،
چنڊ ڪتين جا قافيا ميڙي.
جُوءِ ڀٽائيءَ جاڳائي آ،
صدين جا اوجاڳا ميڙي!