حضرت عبد الله بن عمر جي قبر تي ٻيو ڀيرو حاضري:
ساڳي آچر جي وچين نماز ڌاري پروگرام مطابق حاجي محمد ابراهيم لاشاري ۽ سندس پٽ محمد طاهر ڪار ڪاهي اسان جي جاءِ تي اچي پهتا. گاڏي ۾ ويهي شارع حسان بن ثابت وٺي حي الزاهر (زاهر محله) جو رخ ڪيوسون. شارع حسان بن ثابت تي هلندي واٽ تي “ابراج شهداءَ” (شهداءَ محل) محطة شهداءَ للمحروقات (فائر برگيڊ اسٽيشن) آيا، جن کان ٿورو اولهه طرف مڙي اسان حضرت عبد الله بن عمر فاروق رضه جي گهر وٽ اچي پهتاسون. اسان ته اڳ ۾ پيدل وڃي انهي جي زيارت ڪري آيا هئاسون، پر هن ڀيري فقط حاجي ابراهيم صاحب جي اصرار تي ساڻس گڏجي آيا هئاسون. گاڏي روڊ جي ڀر ۾ بيهاري، اسان حضرت عبدالله بن عمر فاروق رضه جي خاندان جي رهائشي بلڊنگ واري مين گيٽ تي لڳل گهنٽي وڄائي ته، انٽرڪام تي اندران ساڳي عورت جو آواز آيو، جيڪو اسان پهرين زيارت دوران گهنٽي وڄائيندي ٻڌو هو. اها عورت شايد فاروقي خاندان جي نوڪرياڻي هئي جيڪا انهي ڊيوٽي تي مقرر هئي. عورت پڇيو ته ڪير؟ مون ساڳيو اڳوڻو جملو (جواب) دهرايو ته، اسان پاڪستاني مهمان آهيون. تنهن تي موٽ ۾ ڪوبه جواب/ ورندي نه ٻڌي اسان کي اميد ٿي ته، شايد هن ڀيري مڪي ۾ فاروقي خاندان جي سربراهه جناب شيخ ايمن صاحب سان ملاقات ٿيندي! سو دروازي کان ڪجهه پر ڀرا بيهي انتظار ڪرڻ لڳاسون. اسان جون اکيون در ۾کتل هيون. ٿوري دير ۾ گيٽ جا طاق کليا ته، ڇهن ستن سالن جي ڇوڪريء دروازي وٽ بيهي اسان کي چڱي طرح جانچڻ لڳي، اسان خاموشي سان بيٺا رهياسون. ڇوڪري هر هڪ جي حليه کي جانچي ڏسي واپس هلي وئي. گهڙي کن ۾ وري هڪ ڇوڪرو اٺن نون سالن جو دروازي وٽ بيهي اسان کي گهورڻ لڳو. اسان مان ڪنهن به ان ڇوڪر سان نه ڳالهايو. اهو به ڏسي ڏسي واپس ويو هليو ته تجسس آميز نظرن سان انهي دروازي ڏي ڏسڻ لڳاسون ته هاڻي ڪير ٿو اچي؟ پل کن ۾وڏي عربي ڪاري برقعي ۾ ملبوس عورت کليل طاق اڌ ورائي بيهي رهي ۽ اسان کي ڏسڻ لڳي. سعودي عورتن جا ڪارا برقعا اهڙا آهن جو اهي پائڻ کانپوءِ عورت جي چهري جي خبر نه ٿي پوي ته ڪهڙي پاسي اٿس. ڇو ته هڪ ته اهي چهري جي چوڌاري بند هوندا آهن ٻيو ته، پاڪستاني برقعي (چادري ) جي ڀيٽ ۾ ٿلهي ڪپڙي وارا هوندا آهن. سعودي عورتون ڪاري برقعي سان گڏ هٿن تي ڪارا جوراب ۽ مردن وانگر ڪارا بوٽ پائن ٿيون. اهي عورتون جسم ۾ مضبوط تمام سگهاريون ۽ هلڻ ڦرڻ ۾تمام تڪڙيون هونديون آهن.
اسان ڪنڌ جهڪائي بيٺا رهياسون ۽ اها عورت اسان جي لباس، وضع قطع، شڪل شباهت جو جائزو وٺي واپس هلي وئي.