ياد جي بارش وُٺي آ رات ڀر
خواهشن جي دز اُڏي آ رات ڀر
سار جا ڇيڻا ٿڦيندي دوستو
دِل ۾ هڪ کُوري دُکي آ رات ڀر
چائنٺ تي آشا جا شيشا هِن چٻيا
ريت تي ٻيڙي ڊُڪي آ رات ڀر
بيقرارين جي سفر تي ديد هُئي
رُڃ ۾ هرڻي لُڇي آ رات ڀر
رات ڀر دِل جي ٽجوڙي هُئي کُليل
نِنڊ جي پونجي لُٽي آ رات ڀر
سرڪشي تنهنجي سُڳنڌ جي ساهڙي
ڌِيان جي اُڀ ۾ گھُلي آ رات ڀر
رقصُ هو ٻريل اڱارن جي مٿان
هيڪلي شمع رُني آ رات ڀر
پر پٽيل پنڇي جيان ’ساحر‘ اسان
موت جي آهٽ ٻُڌي آ رات ڀر