ڪارو پاڻي
ڄام پور جي ڏکڻ اولهه ۾ هڙند جي پاسي کان هڪ جابلو نئه آهي، جنهن ۾ هر وقت ڪجهه نه ڪجهه پاڻي هوندو آهي. مقامي ماڻهو ان کي ’ڪارو پاڻي‘ چون ٿا. بلڪل ائين جيئن سنڌ جي ڪاڇي ۾ جابلو نئن جي پاڻيءَ کي چئجي ٿو. اڳي رود ڪوهِي سرشتي جو پاڻي به ڳوٺن کي ملندو هو، جن تي ربيع ۽ خريف جا فصل ڪندا هئا.
پاڻي جي اڻاٺ سبب ماڻهو تراين ۾ پاڻي گڏ ڪن ٿا پر پوءِ سوڪهڙي وقت انهن هٿرادو تراين ۾ کوهه کوٽي پاڻي پين. سطح گهٽ ٿيڻ کانپوءِ پاڻي ٻاڙو ۽ ڪڙو ٿيو پوي. اهڙين حالتن ۾ ڪاري پاڻي واري نئه مان پاڻي گهرايو ويندو هو. سرڪار ڏڪر وقت ماڻهن جي ڪوڪار ٻڌي پاڻي گهرائڻ جو بندوبست ڪندي هئي. ڪارو پاڻي سال ۾ ٽي چار ڀيرا وهي داجل تائين پهچي ٿو، جتان نالن جي ذريعي ترايون ۽ تلاءَ ڀريا وڃن ٿا.