روهڙي
روهه معنيٰ ٽڪري ۽ روهڙي معنيٰ ننڍڙي ٽڪري. هيءُ سڌو سنئون جاگرافيائي نالو آهي. روهڙي، ٽڪرين تي ٺهيل آهي. سنڌوءَ اروڙ کان منهن موڙيو ته هتان اچي نڪتي ۽ ان جي ڪڍ اروڙ جي آبادي به هتي اچي گهر اڏيا. پر ان کان به اڳي هيءُ ٽڪريون آباد هيون جنهن ڪري شڪ پوي ٿو ته ان کان به اڳ ڪڏهن سنڌوءَ جو وهڪرو سکر روهڙيءَ جي ٽڪرين وٽان هو. سکر ۽ روهڙيءَ جي ٽڪرين تان نه فقط پٿر جي دور جا اوزار لڀجن ٿا پر پوءِ وارن وقتن ۾ به هتي آباديون موجود هيون. اهو سلسلو سکر جي اتر کان لاکين جي دڙي وٽان شروع ٿي ڪوٽڏجيءَ جي آثارن تائين هلي ٿو.