نَينهن ٽڪر
نينهن ٽڪر سامونڊي، درياهي ۽ هوائي وهڪرن سان گڏوگڏ زلزلي جي به ڪارستاني آهي جنهن کي هاڻي وڏي ڏندڪٿائي حيثيت ملي وئي آهي. ٽڪر جي پاڙ ۾ وڏيون ڇِپون اهڙيءَ طرح اچي پيون آهن جو اهي قديم دور ۾ ماڻهن اجهي لاءِ استعمال ڪيون. اڄ به هڪ اهڙي ڇِپ هيٺان هڪ خلاصي اجهي کي نئين دور جو در هڻي ڪمرو ٺاهيو ويو آهي. هتي ڪنهن فقير جو قبضو آهي. هتي هڪ ڊگهي قبر به آهي جيڪا ڇتن شاهه جي چئي وڃي ٿي. هڪ همراهه ٻڌايو ته نينهن ٽڪر محمد بن قاسم جي ڪرامتي ترار سان ان وقت چئن ٽڪرن ۾ ڏري پيو. جڏهن هن ڪافر راجا ڏاهر تي ترار جا وار ڪيا هئا. ٽڪر ٽي چار سؤ فُٽ اوچو آهي پر ڪٿا ٻڌائيندڙ همراهه جو تخيل ان کان به وڏو هو.