شاعري

حسن درس جو رسالو

حسن درس جي شاعريءَ جي محبوبا ڀلي ڪينجهر ڍنڍ هجي پر سچ ته حَسن جي شاعريءَ ۾ سنڌ جي سونهن جهلڪي ٿي. هو محبتن، مُرڪن ۽ عاشقن جو شاعر هو، جنهن جي شاعري هر دل کي جهومائي وجهندي هئي. اسان وٽ اهڙا گهٽ شاعر آهن جن جي سڃاڻ سندس ڪتاب کانسواءِ ئي شاعري بڻي هجي، انهن مان حسن درس جو مقام به مٿانهون آهي. اسان جي سنڌ سان سڀ کان وڏو الميو اهو رهيو آهي جو انقلابين ۽ عاشقن جي زندگي مختصر رهي آهي ۽ ايئن ئي حسن درس به اسان کان موڪلائي هليو ويو.

  • 4.5/5.0
  • 25044
  • 4945
  • آخري ڀيرو اپڊيٽ ٿيو:
  • حسن درس
  • ڇاپو پھريون
Title Cover of book Hassan Dars jo Risalo

لھر ٿي جاڳي ڪري ٻي لھر ۾،

لھر ٿي جاڳي ڪري ٻي لھر ۾،
ڇو سمندر ڇو ڀلا سمھين نٿو؟

رات جي ڏيئي ۾ جاڳن ٿا جنم،
گھنڊ مندر ڇو ڀلا سمھين نٿو؟

زندگي، ڪيڏي ذلالت، شڪستون،
تون سڪندر ڇو ڀلا سمھين نٿو؟

ٻھر ڪيڏو اڄ مسافر مينھن آ،
منھنجي اندر، ڇو ڀلا سمھين نٿو؟

جاڳ جي ٻيڙي ته پرزا ٿي چُڪي،
شاھ بندر ڇو ڀلا سمھين نٿو؟

گھر ته ڀاتين سان سُتو آ ڀاڪرين،
کڙڪندڙ در، ڇو ڀلا سمھين نٿو؟