اسانجي ننڊ قتل ٿي !
اسانجي ننڊ قتل ٿي جنھن نموني وري،
اسانجا خواب وري خون خون ٿيا آھن،
وري سمھي نه سگھياسين صديون ٿيون آھن،
اسانجا پيار مُئا اڌ ۾ پيا آھن.
ڀڳا ويا ھڏ، متان ڪو اُٿي نچي جھومي،
ڪپي زبان وئي جيئن نه ڪو ڪنجھي ڪُرڪي،
زخم زخم جو بدن تي سھارو آھي بنيل،
ٻڪن جا ٻُڪ متان، لوڻ ڪو پيو ٻُرڪي.
رڳو سزا جي ھن سموري سفرنامي ۾،
اسان سان آھي عقويت ۽ ٻي سختي آھي،
ذلالتن جي ھن زندان جي اسيرن کي،
ملي جي روشني ۾ ته بس رڳو بدبختي آھي.
اسانجا لاش لڪي جبل ۾ ۾ ڳجھون کائن،
ڀلي غسل نه ملي قيمتي ڪفن نه ٿئي،
ڀلي نه آخري ديدار لاءِ اچي ڪوئي،
۽ اعزاز سان دُنيا ۾ ڀل دفن نه ٿئي.