روميءَ جو رقص آھي
قونيا ۾ ڪيف وارو، روميءَ جو رقص آھي،
ھن دل قلندريءَ ۾، ڌم ڌم ڌمال آھي!
ھن پٽ کي وڇائي، ويڙھي سگھان ٿو آئون،
ھر خيال جي خدائي، کيڙي سگھان ٿو آئون،
مٽي مان ھر ڪو ماڻھو، ميڙي سگھان ٿو آئون.
آواز مان اُٿڻ جي، ڪيفيت ڪمال آھي!
مون ۾ ئي آڳ جرڪي، مون مان ئي گل بڻيو آ،
مون ۾ ئي جُز ڦٽو آ، مون ۾ ئي ڪل ڇڻيو آ،
مون کي ڄڻيو محبت، محبت کي مون ڄڻيو آ،
جڳ مڳ ملال آھي، جھرمر جمال آھي!
ھي رقص بي خودي آ، ديوانگي صدين جي،
ھن ۾ روانگي آ، ساري رکيل ندين جي،
دنيا نه اسان سامھون، بيھي سگھي بدين جي،
ڇيرين جي ڇما ڇم، سمجھيم سوال آھي!