گل گلابي تو جيان!
منھنجي رت ۾،
گل گلابي تو جيان،
مھڪندا ٿا رھن،
سار تنھنجي، سندا سوجھرا،
سُر سوين،
۽ جھنگلي سوئرن جھڙا،
ڪئين نظم،
منھنجي سيني ۾،
سھڪندا ٿا رھن،
منھنجي سپنن ۾ سمھي پوڻ کان پوءِ،
منھنجي تن بدن ۾،
ڪيترا وڻ ٿي ڦٽا،
۽ آئون پاڻ ۾،
ڪيترو گھاٽو ٿيس!
جنھنگل جيان!
ڪيتريون پن ڇڻ،
پنھنجا اگھاڙا پير،
مون ۾ ڀلجي ويون،
۽ ڪيئن بھارون،
پنھنجا ويس وڳا،
مون ۾ لاھي ويون ھليون،
۽ اڄ به منھنجي ٻانھن جا،
ڏار ٻٻرن جا،
ٻھڪندا ٿا رھن.