منھنجي محبوبا!
آڌي رات اُٿي، توکي دُعا ٿو ڪريان،
توکي دعا ٿو ڪريان، پنھنجي موت مرين،
طبعي موت مرين، منھنجي محبوبا،
ساري رات ٻرين، منھنجي محبوبا،
۽ پوٺپ ٺرين، منھنجي محبوبا،
ايندڙ ماڻھن کان وقت وصول ڪرين،
ٻيو ڪجھه ڪين ڪرين، منھنجي محبوبا،
لڙڪن کان به لڪي سارو شھر گھمين،
ٽھڪن کان به ٽرين، منھنجي محبوبا،
توکي ايندو ھي آخر ياد حسن،
ڳالھين منجھه ڳرين، منھنجي محبوبا،
آخر ھڪڙي ڏينھن ٿيندئي خاتمو،
اوندھ منجھه ڍرين، منھنجي محبوبا.