فيصلو
ننڊ قتل ٿي ويئي جن جي
تن سان توکي ھلڻو پوندو
ساھ سِسِيءَ مان نڪتو يا نه
چُپُ چوي پئي اچڻا آھن
رت جي ليڪ لڪل جي ڀرسان
بيٺا آھن بچڻا آھن
ڳوڙھن ڳالھه نه ڪيئي جن جي
تن سان توکي ھلڻو پوندو
ننڊ قتل ٿي ويئي جن جي . . .
موٽيا ناھن جيڪي ماڻھو
پنھنجي گھر ۽ گھاٽ وٽان
واپس آھن ٿيڻا جيڪي
وقت وصل ۽ واٽ وٽان
ڀڙڪيل آڳ اڳي ئي جن جي
تن سان توکي ھلڻو پوندو
ماڻھو جيڪي پنھنجي من جي
مٽيءَ ۾ مدفون ٿيا
جاڳ به جن جي جيئري ناھي
خواب به جن جا خُون ٿيا
پريت ڦندي ۾ پيئي جن جي
تن سان توکي ھلڻو پوندو
ننڊ قتل ٿي ويئي جن جي
تن سان توکي ھلڻو پوندو .