اسٽيفي گراف لاءِ!
تون دنيا کي ٽينِس ڪورٽ سمجھين ٿي،
تون ڏاڍي تيز کيڏين ٿي،
تنھنجي ھر ادا،
ھر چُمي، ڀاڪر،
رسڻ پرچڻ،
تيز شاٽس جيان آھي.
تاري کِڙڻ جيڏي آ تيزي،
تنھنجي ھر عمل ۾،
تون ڏاڍو تيز ٿي کيڏين!
ڦھليل آسمان ھيٺان،
ڌرتيءَ جي ھِن گولي تي،
سمنڊ وانگي انھن تماشائين جو،
تعداد تمام گھٽ آھي.
جيڪي ھارائيندڙن سان گڏ ھجن،
تون اھا پھرين ڇوڪري نه آھين،
جيڪا پيار کي به،
وِمبلڊن ٽرافي سمجھي ٿي،
دِل جو ٻيو نالو به دل آھي،
۽ ھن نالي جو اعزاز ،
ماڻھو وڃائڻ لاءِ حاصل نه ڪندو آھي.