رات جي گھوڙي جڙي
رات جي گھوڙي جڙي،
چاندني در تي کڙي،
ھڻ جوانيءَ کي اڙي،
ڪير ڪنھن جي لاءِ رُڪي؟
ڪير ڪنھن جي لاءِ رُڪي؟
رات جي گھوڙي تِکي،
زندگي جنھن مان سِکي،
ڪنھن مٽي ڪنھن جي لِکي،
ڪير ڪنھن جي لاءِ رُڪي؟
ڪير ڪنھن جي لاءِ رُڪي؟
رات جي گھوڙي ڀڄي،
وقت واچوڙو وڄي،
پير پيو ھر ڪو کڄي،
ڪير ڪنھن جي لاءِ رُڪي؟
ڪير ڪنھن جي لاءِ رُڪي؟
رات جي گھوڙي ڪُڏي،
تخت ۽ تختو لُڏي،
ڌوڙ ڌڙڪي ۽ اُڏي،
ڪير ڪنھن جي لاءِ رُڪي؟
ڪير ڪنھن جي لاءِ رُڪي؟