طلسم مڪر جا ٽوڙڻ چاهيان ٿو
رُخ زندگي جا موڙڻ چاهيان ٿو
نفرتن جون ديوارون ڀڃي ڀوري
محبتن جا ناتا جوڙڻ چاهيان ٿو
حسد، وير ڪيني جورو جفا جا
ڪُن ڪلاچيءَ ۾ ٻوڙڻ چاهيان ٿو.
ڪارونجهر ڪشمور ڪينجهر ڪاڇي
گورک تي پير کوڙڻ چاهيان ٿو
ڇڏي ڪاهلي چپاتن جيئان چڙهي
ننڍ نيڻن جي اکوڙڻ چاهيان ٿو
ڪلهي ڪينرو پائي صدائون هڻندو
جهنگ جبل برپٽ ووڙڻ چاهيان ٿو
وقت جو ڪندي احساس حوصلي سان
تيز منزلن ڏي ڊوڙڻ چاهيان ٿو
زيور تعليم جو جوڙي قلم سان
خون پنهنجي کي ولوڙڻ چاهيان ٿو
نقلي چهرن کي هت ڪري بي نقاب
رنگ سارا بد نچوڙڻ چاهيان ٿو
ڪارو ڪاري جا ظلم پياسي ڏسي
زخم پنهنجا اُڊوڙڻ چاهيان ٿو.