جن ئي اکڙين مور ڏٺو مون
تن ئي تن منجهه چور ڏٺو مون
پن پن ٽاري مکڙي مکڙي
ڀڻ ڀڻ ڀڻندو ڀونئر ڏٺو مون
چاهه مان اڏري چانڊوڪي ڏي
چڙهندو چنڊ چڪور ڏٺو مون
سهڻي دريا پار ڪندي اُت
لهرن وچ ۾ شور ڏٺو مون
طوق گلي زنجير ڪلهن ۾
هٿ ۾ تنهجي ڏور ڏٺو مون
شاخ تان بلبل جو آکيرو
پٽ تي ڪرندي ڀور ڏٺو مون
هيڏي روشني جي دريا منجهه
ٻاٽ اوندهه جو پور ڏٺو مون
سچ جو ساٿي ڪير نه ڪنهنجو
دل ۾ ڪندي غور ڏٺو مون
جنهن سان مون پريت نڀائي
ظالم اڄ سو زور ڏٺو مون