ٻَھ ٻَھ ٻَري ٿي من ۾ جذبات مُسلسل.
ڏِسُ ڏيل ۾ ڏِياٽيون آ ڏات مُسلسل.
هي زندگي فنا جو آهي عجب فسانو،
دل کان کَٽي وڃي ٿي جو مات مُسلسل.
اُڀري صبوح ايندو من جي اُميد مان ڪو،
ڄاڻان ٿو ڪين رهندي هيءَ رات مُسلسل.
اظھار منھنجي دل جو گونگو گگن جيان،
گُهٽبي رهي اندر ۾ هر بات مُسلسل.
تومان جي ٻاهر نڪران ته پاڻ کي ڏسان،
تَن ۾ تَنوار تنھنجي آ تات مُسلسل.
جيئڻ سَندو جَھنم جِيءُ ۾ جَلي رهيو آ،
پوءِ به ڏنا مون کي ڏَڍ ڏات مُسلسل.
هُو ڏور ٽِمٽمائن ٿا تارڙا گگن ۾،
جُهڙ مان لِڪي هَڻن ٿا سڀ جهات مُسلسل.
*