وقت گُذري نٿو گُذاريان پيو،
ڇا ڪيان جو جيئڻ ضروري آ،
کِلندي کِلندي مَرڻ ضروري آ،
ڪين ايندينءَ مگر نھاريان پيو،
وقت گُذري نٿو گُذاريان پيو.
*
ساري دنيا جيئي ٿي پَيسي لئه،
نيٺ پَيسي پُٺيان مَري ٿي وڃي،
ڪوڙ تي ايترو هِري ٿي وڃي،
سچ ٻُڌي ئي نٿي هڪ لمحي لئه،
ساري دنيا جيئي ٿي پَيسي لئه.
*
ننڊ هُن کي اچي وئي شايد!
جاڳ! تنھنجي طويل رستي ۾،
موت جي گُم ٿيو آ سپني ۾،
رنگ، چُپ جو آ سُرمئي شايد!
ننڊ هُن کي اچي وئي شايد!
*
روز ملنداسين ۽ وِڇڙنداسين،
هيءُ دستور آهي دنيا جو،
سڀ کي اُلڪو رهي ٿو عقبيٰ جو،
ڪين آسيس ڪنهن لئه ٿينداسين،
روز ملنداسين ۽ وِڇڙنداسين.
*