خوابن ۾ هڪ رات پُراڻي رهجي وئي.
جنهن ۾ ٽِڙندڙ رات جي راڻي رهجي وئي.
توکي جيڪا ڳالهه چوڻ مون چاهي پئي،
اُڃَ ۾ بي سُڌ پيئندي پاڻي رهجي وئي.
تو جا ڳُجهه ۾ ڳالهه ٻُڌائي مون کي هئي،
اُن جي توکان ڇو سَمجهاڻي رهجي وئي؟
ٻُڌندي ٻُڌندي ننڊ اچي جو ويندي هئي،
ننڍپڻ جي اَڻ پُور ڪھاڻي رهجي وئي.
مان ئي هڪڙو پاڳل اُن مان هليو ويس،
باقي ساري دنيا سياڻي رهجي وئي.
ٻار اُڃايل پُڇيو دريا ڪاڏي ويو؟
سَرد ڀَري هڪ آھ، مُھاڻي رهجي وئي.
*