درد جو دُونھون
اکين ۾ جاڳ آ جَلندي،
تڏهن ڪي خواب هِن پَچندا.
جئين لُک تيز تَر لڳندي،
تئين رِڻ روح ۾ رَچندا.
حياتيءَ جي گهٽي سوڙهي،
سُرنگ آ ساھ ۾ گَھري.
لڳي هر شام ٿي پوڙهي،
شفق جي آ ٽُٽل اَهري.
ٻُڏان ٿو پنھنجي ساهن ۾،
ڪُنن ۾ ڪيفيت آهي.
حياتيءَ جي نگاهن ۾،
وڃان ٿو سِج کي لاهي.
جلائي دل جي ٽُڪرن کي،
دُکايم درد جو دُونھون.
پُڪاريو مون پَڙاڏن کي،
نه صحرا جو مليو سُونھون.
اندر ۾ سُڃ ٿي سَھڪي،
رَڳن ۾ رِڻَ جا راڙا.
اکين ۾ اُڃَ ٿي ٽَھڪي،
ڪَڙهن ٿا روح ۾ ڪاڙها.
ملي آ مُفلسي اهڙي،
ڀَريل بازار ۾ مون کي،
ڪمائي قرض ۾ جھڙي،
ملي سنسار ۾ مون کي!
*